შედგა ვოლოკოლამსკის მიტროპოლიტ ანტონის შეხვედრა სრულიად საქართველოს კათოლიკოს-პატრიარქ შიო III-სთან

სსკგ-ის კომუნიკაციის სამსახური, 01.10.2026. გააგრძელა რა საქართველოში თავის მოგზაურობა, მოსკოვის საპატრიარქოს საგარეო საეკლესიო კავშირების განყოფილების თავმჯდომარე, ვოლოკოლამსკის მიტროპოლიტი ანტონი და მისი თანმხლები პირები თბილისის წმინდა ადგილებს ეწვივნენ.

რუსეთის მართლმადიდებელი ეკლესიის სტუმრებმა მოილოცეს წმინდა სამების სახ. საკათედრო ტაძარი – სამება, რომელიც აშენდა ნეტარხსენებული კათოლიკოს-პატრიარქის ილია II-ის ინიციატივით.

შემდეგ სსკგ-ის თავმჯდომარე და მისი თანმხლები პირები გაემართნენ უძველესი სიონის ღვთისმშობლის მიძინების საკათედრო ტაძრისკენ, სადაც ვოლოკოლამსკის მიტროპოლიტმა ანტონიმ ახალქალაქის, კუმურდოსა და კარის მიტროპოლიტ ნიკოლოზთან ერთად, მოსკოვისა და სრულიად რუსეთის პატრიარქის მრჩევლის, დეკანოზ ნიკოლოზ ბალაშოვისა და სსკგ-ის თავმჯდომარის მოადგილის, დეკანოზ იგორ იაკიმჩუკის თანამსახურებით, სულის განსასვენებლი ლიტია აღავლინა უწმინდესი და უნეტარესი კათოლიკოს-პატრიარქის, ილია II-ის საფლავზე. ღვთისმსახურებას ესწრებოდნენ სიონის საკათედრო ტაძრის წინამძღვარი, პროტოპრესვიტერი გიორგი ზვიადაძე და რუსეთის ფედერაციის ინტერესების სექციის ხელმძღვანელი საქართველოში შვეიცარიის კონფედერაციის საელჩოსთან დ.ა. ოლისოვი. მეუფე ანტონიმ თაყვანი სცა ტაძარში დავანებულ სიწმინდეებს: წმინდა მოციქულთასწორ ნინოს სასწაულმოქმედ ჯვარს და წმინდა მღვდელთმთავარ იოანე მანგლელის წმინდა ნაწილებს.

შემდეგ სსკგ-ის თავმჯდომარე გორისა და ატენის მიტროპოლიტ ანდრიასა და ახალქალაქის, კუმურდოსა და კარის მიტროპოლიტ ნიკოლოზის თანხლებით, ეწვია კეთილმორწმუნე დიდი მთავრის, ალექსანდრე ნეველის სახელობის რუსულ ტაძარს თბილისში, სადაც მას თბილად დახვდა ტაძრის წინამძღვარი, დეკანოზი ბიძინა გუნია. რუსეთის მართლმადიდებელი ეკლესიის დელეგაციის წევრებმა თაყვანი სცეს წმინდა ზინობის, სქემაში სერაფიმეს, თეთრწყაროელი მიტროპოლიტის და მისი მოწაფის, სქემარქიმანდრიტ ვიტალის (სიდორენკო) საფლავებს.

საქართველოს საპატრიარქოს შენობაში ვოლოკოლამსკის მიტროპოლიტი ანტონი მიიღო საქართველოს მართლმადიდებელი ეკლესიის წინამძღვარმა, უწმინდესმა და უნეტარესმა სრულიად საქართველოს კათოლიკოს-პატრიარქმა შიო III-მ.

შეხვედრაში, რომელიც გულთბილ ატმოსფეროში გაიმართა, რუსეთის მართლმადიდებელი ეკლესიიდან ასევე ესწრებოდნენ მოსკოვისა და სრულიად რუსეთის პატრიარქის მრჩეველი, დეკანოზი ნიკოლოზ ბალაშოვი; მოსკოვის საპატრიარქოს საგარეო საეკლესიო კავშირების განყოფილების თავმჯდომარის მოადგილე, დეკანოზი იგორ იაკიმჩუკი; დეკანოზი ვლადიმერ ალექსანდროვი და საგარეო საეკლესიო კავშირების განყოფილების თავმჯდომარის მდივანი, მღვდელი ნიკოლოზ ვასინი. საქართველოს მართლმადიდებელ ეკლესიას შეხვედრაზე წარმოადგენდნენ: ახალციხისა და ტაო-კლარჯეთის მიტროპოლიტი თეოდორე, ზუგდიდისა და ცაიშის მიტროპოლიტი გერასიმე, გორისა და ატენის მიტროპოლიტი ანდრია, ნიკორწმინდის ეპისკოპოსი ვახტანგი, პროტოპრესვიტერი გიორგი ზვიადაძე, საქართველოს საპატრიარქოს თანამშრომლები – დეკანოზი მიქაელ ბოტკოველი და დეკანოზი ანდრია ჯაღმაიძე.

ვოლოკოლამსკის მიტროპოლიტმა ანტონიმ საქართველოს მართლმადიდებელი ეკლესიის წინამძღვარს გადასცა მოსკოვისა და სრულიად რუსეთის უწმინდეს პატრიარქ კირილეს ძმური სალამი და კეთილი სურვილები. თავის მხრივ, უწმინდესმა და უნეტარესმა პატრიარქმა შიომ მადლობა გადაუხადა რუსეთის მართლმადიდებელი ეკლესიის დელეგაციას ვიზიტისთვის და აღნიშნა ვიზიტის მნიშვნელობა ეკლესიათაშორისი ურთიერთობების განმტკიცების საქმეში. საუბრის მსვლელობისას განხილულ იქნა ძმური თანამშრომლობის საკითხები ორ ეკლესიას შორის, ასევე ზოგადმართლმადიდებლური მნიშვნელობის თემები. შეხვედრის დასასრულს მხარეებმა სამახსოვრო საჩუქრები გაცვალეს.