მოსკოვის საპატრიარქო
სსკგ-ს ქრისტიანთაშორისი ურთიერთობების მდივანი სუდანელ სემინარიელებს შეხვდა
2021 წლის 16 ოქტომბერს ეგვიპტეში მოსკოვის საპატრიარქოს საგარეო საეკლესიო კავშირების განყოფილების ქრისტიანთაშორისი ურთიერთობების მდივანი მღვდელმონაზონი სტეფანე (იგუმნოვი) სუდანელ ქრისტიანებს შეხვდა, რომლებიც ასიუტის პროვინციაში, ელ-მუჰარაკის კოპტურ სემინარიაში სწავლას ამთავრებენ. ყველა ეს სემინარიელი ჩრდილოეთ და სამხრეთ სუდანის საზღვარზე მდებარე სამხრეთ კორდოფანის პროვინციიდანაა და ნუბის ადგილობრივი ავტოქთონების ხალხს მიეკუთვნებიან, რომლებსაც ასევე „მთის ნუბიელებს“ უწოდებენ.
შეხვედრაზე განიხილეს სუდანში არსებული ქრისტიანების მდგომარეობა. მომავალმა მოძღვრებმა აღნიშნეს ის დიდი ცვლილებები, რაც ბოლო წლებში ქვეყნის ცხოვრებაში ხდება, რისი მაჩვენებელიცაა მუსლიმური სახელმწიფოსთვის უნიკალური კანონი რელიგიის თავისუფლების შესახებ.
შეხვედრის მონაწილეებმა გაიხსენეს, რომ სუდანს უძველესი ქრისტიანული ფესვები აქვს. კეთილუწყებამ ქრისტეს შესახებ მის საზღვრებამდე ჯერ კიდევ პირველ საუკუნეში მიაღწია. შემდეგ, საუკუნეების განმავლობაში თანამედროვე სუდანის ტერიტორიაზე არსებობდა რამდენიმე ქრისტიანული სახელმწიფო და ისტორიაში განდიდებული ნუბიის ეკლესია, რომელიც კანონიკურ კავშირში იყო ალექსანდრიის კოპტურ საპატრიარქოსთან. მემკვიდრეობით ქრისტიანმა სემინარიელებმა, რომლებიც კოპტურ ეკლესიას მიეკუთვნებიან, ისაუბრეს იმაზე, რომ დღეს სუდანში მისი ორი ეპარქიაა, და ასევე არის ეთიოპიის ეკლესიის ეპარქია. ასევე წარმოდგენილია სხვა ქრისტიანული კონფესიებიც.
თანამოსაუბრეებმა მღვდელმონაზონ სტეფანეს უამბეს სუდანში არსებული რელიგიათაშორისი ურთიერთობების შესახებ, ასევე ამ ქვეყანაში არსებული სამწყემსო და მისიონერული მოღვაწეობის თავისებურებების თაობაზე. სემინარიელებმა აღნიშნეს, რომ სუდანში მცხოვრები ქრისტიანები დიდი ინტერესით არიან განწყობილები რუსეთის მართლმადიდებელი ეკლესიის მიმართ, რომელსაც მსოფლიოში ერთ-ერთ ყველაზე ავტორიტეტულად მიიჩნევენ. მათ ასევე სმენიათ რუსეთში ბოლო ათწლეულების განმავლობაში უპრეცედენტო სულიერი აღორძინების შესახებ. მღვდელმონაზონმა სტეფანემ მომავალ სუდანელ მწყემსებს რუსეთის მართლმადიდებელი ეკლესიის ამჟამინდელი მუშაობის შესახებ უამბო აფრიკის მიმართულებით, მათ შორის კონტინენტის რამდენიმე ქვეყანაში დევნულობაში მყოფი და-ძმების მხარდაჭერის სფეროში.
სუდანელი სემინარიელები სავსენი არიან ენთუზიაზმითა და სურთ გახდნენ მღვდლები, რადგან იციან, რომ მათი მსახურება მოთხოვნადია მათ სამშობლოში, სადაც მათ ელოდებათ თანამორწმუნეთა მრავალრიცხოვანი თემები. მამა სტეფანემ მათ წარმატებები უსურვა მომავალ სამწყესო საქმიანობაში და მიიწვია, ეწვიონ რუსეთს კოპტური ეკლესიის ერთ-ერთი დელეგაციის შემადგენლობაში.
სსკგ-ს საკომუნიკაციების სამსახური
პატრიარქი
განყოფილების თავმჯდომარე
08.05.2025
21.04.2025
08.05.2025
20.04.2025