ფორუმში, რომელიც ყოველწლიურად იმართება მახაჩკალისა და დერბენტის მთავარეპისკოპოს ვარლაამისა და დაღესტნის მუფტის, ახმად აფანდი აბდულაევის ინიციატივით, მონაწილეობა მიიღეს სასულიერო პირებმა, რელიგიური და საზოგადოებრივი ორგანიზაციების წარმომადგენლებმა რუსეთის სხვადასხვა რეგიონიდან და საზღვარგარეთის ქვეყნებიდან, ექსპერტებმა ექსტრემიზმისა და ტერორიზმის იდეოლოგიის წინააღმდეგ ბრძოლაში და რუსეთის ტრადიციული რელიგიების თემების ახალგაზრდა აქტივისტებმა.

დაღესტნის რესპუბლიკის მეთაურის, სერგეი მელიკოვისა და პირადად თავისი სახელით ფორუმის ორგანიზატორებსა და სტუმრებს მიესალმა დაღესტნის მთავრობის თავმჯდომარე აბდულმუსლიმ აბდულმუსლიმოვი.

შეკრებილ საზოგადოებას სიტყვით მიმართეს მახაჩკალისა და დერბენტის მთავარეპისკოპოსმა ვარლაამმა და გროზნოსა და სუნჟენსკის ეპისკოპოსმა ამბროსიმ.

დაღესტნის რესპუბლიკის მუფტის, ახმად აფანდი აბდულაევის მისალმება ფორუმის მონაწილეებს გადასცა მისმა მოადგილემ, მუჰამედ ხაჯი მაგომედოვმა.

დაღესტნის იუდეველთა თემის სახელით სიტყვით გამოვიდა გაზეთ „ვატანის“ მთავარი რედაქტორი მოსე ავრუმოვი.

გახსნის ცერემონიას უძღვებოდა ახალგაზრდებში აქტიური სამოქალაქო პოზიციის ფორმირების, ეთნიკური და კონფესიათაშორისი კონფლიქტების პრევენციის, ტერორიზმის წინააღმდეგ ბრძოლისა და ექსტრემიზმის პრევენციის საკოორდინაციო ცენტრის (დაღესტნის სახელმწიფო უნივერსიტეტი) ხელმძღვანელი, მაგომედ მაგომედოვი.

ფორუმის ფარგლებში ჩატარდა სამეცნიერო კონფერენციები, სემინარები, მრგვალი მაგიდები, ასევე სასულიერო პირებისა და ექსპერტების შეხვედრები უმაღლესი და საშუალო სპეციალიზებული საგანმანათლებლო დაწესებულებების სტუდენტებთან.

23 სექტემბერს დაღესტნის რ. გამზატოვის სახელობის სახელმწიფო პედაგოგიურ უნივერსიტეტში სიტყვით გამოვიდა რელიგიური განათლებისა და კატეხიზაციის სინოდალური განყოფილების თავმჯდომარის მოადგილე, იღუმენი იოანე (რუბინი). მამა იოანემ აღნიშნა დსპუ-ს სტუდენტების მაღალი ინტერესი და მზადყოფნა კონსტრუქციული დიალოგისთვის რელიგიათაშორისი და ეროვნებათაშორისი თანხმობის აქტუალურ საკითხებთან მიმართებით და ხაზი გაუსვა იმას, რომ ახალგაზრდა თაობა საკვანძო რგოლს წარმოადგენს რუსეთის სხვადასხვა რელიგიის წარმომადგენლებს შორის მშვიდობასა და ურთიერთგაგებაზე დაფუძნებული მომავლის მშენებლობის საქმეში.

23 სექტემბრის საღამოს მთავარეპისკოპოსმა ვარლაამმა მახაჩკალის ეპარქიის ადმინისტრაციაში მიიღო ახალგაზრდული საერთაშორისო რელიგიათაშორისი ფორუმის მონაწილე ექსპერტები – სასულიერო პირები.

ეპისკოპოსმა ამბროსიმ და სტუმრებმა მოსკოვიდან, რუსეთის რეგიონებიდან, საქართველოდან და სერბეთის რესპუბლიკიდან ილოცეს ღვთისმშობლის მიძინების საკათედრო ტაძარში.

მეუფე ვარლაამი სტუმრებს ესაუბრა ტაძრის ისტორიაზე, 2024 წლის ივნისის ტრაგიკულ მოვლენებზე და საკათედრო ტაძრის კურთხევის 120 წლის იუბილესთან დაკავშირებულ მზადებაზე.

24 სექტემბერს ფორუმი გაგრძელდა რუსეთის უძველეს ქალაქ დერბენტში.

სულეიმან სტალსკის სახელობის ლეზგინის მუსიკალურ-დრამატულ თეატრში გაიმართა სრულიად რუსეთის სამეცნიერო-პრაქტიკული კონფერენციის – „ტრადიციისა და ინოვაციის ერთობა: რელიგია, ციფრული უსაფრთხოება და პროექტული გადაწყვეტილებები ტერორიზმთან ბრძოლაში“ – პლენარული სხდომა.

ისლამურ სამყაროსთან ურთიერთქმედების ექსპერტთა საბჭოს თავმჯდომარემ, მღვდელმონაზონმა გრიგოლიმ (მატრუსოვი) თავის მოხსენებაში დამსწრე საზოგადოებას გაუზიარა მოსაზრებები ქრისტიანობასა და ისლამში ღვთის სიტყვის გაგების, ასევე კაცობრიობის რელიგიური გამოცდილების მრავალფეროვნებისა და ტრადიციულ მსოფლიო რელიგიებში ერთი ღმერთის რწმენის აღიარების შესახებ. დასასრულ, მამა გრიგოლიმ დარბაზში შეკრებილ ახალგაზრდებს მოუწოდა, მიჰყვნენ მოციქულ პავლეს გამოთქმას: „მარადის გიხაროდენ. მოუკლებელად ილოცევდით. ყოველსა შინა ჰმადლობდით“ (1 თეს. 5:16-18).

იმავე დღეს ფორუმის მონაწილეებმა მოინახულეს რუსეთის უძველესი ჯუმა მეჩეთი, ისტორიული სინაგოგა „კელე ნუმაზი“ და ყოვლადწმინდა ღვთისმშობლის საფარველის ტაძარი, სადაც მათ შეხვდა წინამძღვარი, მღვდელი მიხეილ ლობოვი.

ისინი გაეცვნენ სინაგოგისა და ტაძრის აღდგენით სამუშაოებს, რომლებიც დაზიანდა 2024 წლის 23 ივნისს ტერორისტული თავდასხმის დროს და პატივი მიაგეს იმ დღეს დაღუპულ დეკანოზ ნიკოლოზ კოტელნიკოვის ხსოვნას; ის იყო მახაჩკალის ეპარქიის ყველაზე უხუცესი კლირიკოსი – 45 წლის განმავლობაში მსახურობდა დერბენტის სამრევლოში.

მამა ნიკოლოზის საფლავზე პანაშვიდი გადაიხადეს მღვდელმა მიხეილ ლობოვმა და ფორუმში მონაწილე სასულიერო პირებმა: არქიმანდრიტმა ლუკამ (ბაბიჩი) (სერბეთის მართლმადიდებელი ეკლესია), იღუმენმა იოანემ (რუბინი), არქიმანდრიტმა მაკარიმ (ლიუბავცევი), დეკანოზმა იოანე ბონდარენკომ (საქართველოს მართლმადიდებელი ეკლესია), მღვდელმა სერგი აბასოვმა და დიაკონმა ალექსანდრე ლენშმიდტმა. ლოცვები და საგალობლები სამ ენაზე შესრულდა: საეკლესიო სლავურ, სერბულ და ქართულ ენებზე.

მოგზაურობა დასრულდა ნარინ-კალას ციტადელის მონახულებით, რომელიც მსოფლიო მნიშვნელობის გამორჩეული ისტორიული და კულტურული ძეგლია.

საღამოს „კასპიის“ სანატორიუმში გაიმართა მრგვალი მაგიდა თემაზე „სსრკ-ის რელიგიური ორგანიზაციების პატრიოტული საქმიანობა დიდი სამამულო ომის წლებში“.

25 სექტემბერს XII ახალგაზრდულმა საერთაშორისო რელიგიათაშორისმა ფორუმმა მუშაობა დაასრულა.

ინფორმაცია გაზიარებულია Патриархия.ru და მახაჩკალის ეპარქიის საიტებიდან