პიუხტიცას მონასტრის დები: პატივცემულო დეპუტატებო, რატომ ცდილობთ კანონიკური დანაშაულის ჩადენა გვაიძულოთ?

სსკგ-ის კომუნიკაციის სამსახური, 08.04.2025. 2025 წლის 9 აპრილს ესტონეთის რიიგიკოგუ (პარლამენტი) აპირებს მესამე მოსმენით კენჭს უყრის კანონპროექტს ეკლესიებისა და სამრევლოების კანონში ცვლილებების შეტანის შესახებ, რომელიც პირდაპირ მიმართულია ესტონეთის მართლმადიდებელი ეკლესიის წინააღმდეგ და მიზნად ისახავს, მათ შორის, ლიკვიდაციის მუქარით აიძულოს სამრევლოები და პიუხტიცას მონასტერი შეიცვალონ იურისდიქცია.

ამასთან დაკავშირებით, პიუხტიცას მონასტრის იღუმენიამ და მისმა ბინადრებმა კვლავ მიმართეს ღია წერილით რიიგიკოგუს წევრებს, ყველა ქრისტიანს და ესტონეთის ყველა მოქალაქეს. წინა ორი მიმართვა თებერვალში გამოქვეყნდა.

ღია წერილში, რომელსაც ხელს აწერენ იღუმენია ფილარეტა (კალაჩევა) და სავანის დები, ნათქვამია:

ხვალ რიიგიკოგუ გადაწყვეტს ჩვენს ბედს, პიუხტიცას მონასტრის ბედს, მისი ბინადრების - პიუხტიცას მონაზვნების ბედს. ღრმად ვწუხვართ, რამეთუ კარგად გვესმის, როგორი იქნება ეს გადაწყვეტილება: ჩვენი ერთობა დედა ეკლესიასთან ჩაითვლება ესტონეთის რესპუბლიკის კანონის დარღვევად...

როგორც არაერთხელ აღვნიშნეთ, ახლაც ვიმეორებთ, რომ რუსეთის მართლმადიდებელ ეკლესიასთან კავშირი ჩვენი მონასტრის დაარსების საფუძველში ძევს. ეს კავშირი ეფუძნება კანონებს, რომლებიც შეადგენს საეკლესიო კანონმდებლობის არსს. ეს არის კანონი ისეთივე ხელშეუხებელი ეკლესიური ცხოვრებისათვის, როგორც, მაგალითად, კონსტიტუცია სამოქალაქო საზოგადოებისთვის. ჩვენ გვთავაზობენ თვითნებურად გადავიდეთ სხვა იურისდიქციაში – კონსტანტინოპოლის საპატრიარქოში. წინადადება არ ითვალისწინებს იმ ფაქტს, რომ იურისდიქციის შეცვლა შიდა საეკლესიო ცხოვრების საქმეა, რომელშიც ესტონეთის კონსტიტუციის თანახმად, სახელმწიფო არ და ვერ უნდა ერეოდეს. მონასტრის გადასვლა კონსტანტინოპოლის საპატრიარქოში პარლამენტის წევრებს მარტივ და გონივრულ გადაწყვეტილებად მიაჩნიათ. ეს არის ეკლესიისგან შორს მყოფი ადამიანების თვალსაზრისი, რომლებიც მოვლენებს პოლიტიკური მიზანშეწონილობის პერსპექტივიდან უყურებენ. მაგრამ ჩვენთვის, წმინდა პიუხტიცას მონასტრის მკვიდრებისთვის, ეს კანონიკური დანაშაულია. ჩვენ არ გვაქვს ამის უფლება!

ჩვენ მონაზვნები ვართ და ჩვენი ცხოვრების აზრი ქრისტეს მიმდევრობაა. მის წინაშე დავდეთ ჩვეენ სამონასტრო აღთქმები და ერთგულება შევიფიცეთ – მას, იესო ქრისტეს, და არა სახელმწიფო ლიდერებს, არა პოლიტიკურ პარტიებს. ჩვენ მას ერთგულებას ვეფიცებოდით და ვუმოწმებდით, რომ სიკვდილამდეც მისი ერთგული დავრჩებოდით, და ჩვენი სურვილი არ ეწინააღმდეგება ესტონეთის რესპუბლიკის კონსტიტუციას. ჩვენ კი გვსაყვედურობენ სამონასტრო აღთქმის ერთგულებისთვის. ამასთან დაკავშირებით გვსურს დაგისვათ კითხვა: ძვირფასო დეპუტატებო, რატომ გვაიძულებთ სინდისის წინააღმდეგ წასვლას? რატომ ცდილობთ გვაიძულოთ კანონიკური დანაშაულის ჩადენა? რატომ არ სცემთ პატივს იმ ადამიანებს, რომლებიც სხვა ცხოვრებით ცხოვრობენ და, როგორც ჩანს, თქვენთვის სრულიად გაუგებარი ცხოვრებით? განა არ არის ნათქვამი წმინდა წერილში, რომელსაც მრავალი საუკუნის მანძილზე პატივს სცემს მთელი კაცობრიობა, რომ „ღმერთმა მოგვცა იმისი ძალა, რომ ახალი აღთქმის მსახურნი ვიყოთ; არა ასოსი, არამედ სულისა, ვინაიდან ასო კლავს, ხოლო სული აცოცხლებს“ (2 კორ. 3:6).

სახარების ერთი მცნებაც რომ დავარღვიოთ, მონაზვნები აღარ ვიქნებით, რამეთუ ნათქვამია: „ყველას, ვინც ისმენს ჩემს სიტყვებს, მაგრამ არ ასრულებს მათ, მე ვამსგავსებ უგუნურ კაცს, რომელმაც ქვიშაზე ააშენა თავისი სახლი. მოვიდა წვიმა, მოვარდნენ მდინარენი, დაქროლეს ქარებმა და ეკვეთნენ ამ სახლს და დასცეს; და დიდი იყო დაცემა მისი“ (მთ. 7:26-27).

ჩვენ, ღვთისმშობლის მთაზე მდებარე მონასტრის მკვიდრნი, ვარწმუნებთ ესტონეთის ყველა მოქალაქეს, რომ პიუხტიცას მონაზვნები არ მოუწოდებენ სისხლისღვრის, ტერორის, ძალადობისა და სამხედრო აგრესიისკენ. ჩვენ ვწუხვართ, რომ პარლამენტის წევრები, როგორც ჩანს, საპირისპირო აზრს ატარებენ, ხოლო შინაგან საქმეთა მინისტრი ვარაუდობს, რომ თუ დავრჩებით ჩვენი აღთქმების ერთგულნი, მაშინ მოგვიწევს მონასტრის დატოვება. მინისტრს არ ესმის, რომ ეს ჩვენთვის სიკვდილის ტოფასია.

ჩვენ არავის ვუსურვებთ ბოროტებას და ვლოცულობთ, რათა მშვიდობამ და თანაგრძნობამ დაისადგუროს ადამიანთა გულებში. ჩვენ მწარედ განვიცდით დედამიწაზე გამეფებული უსამართლობის ტკივილს. „მთელი ქვეყანა ბოროტებაშია დანთქმული“ – მოწმობს სიყვარულის მოციქული იოანე ღვთისმეტყველი. ასე იყო, ასე არის და ასე იქნება, სამწუხაროდ, თუ კაცობრიობა არ მოუსმენს ღმერთს და არ დაადგება ჭეშმარიტების გზას. ჩვენ ვლოცულობთ ამისთვის.

ჩვენ გულითად მადლობას ვუხდით ყველას, ვინც მხარდაჭერას გვიცხადებს და, პირველ რიგში, ესტონელ საზოგადო მოღვაწეებს ღია წერილისა და მიმდინარე მოვლენების ქრისტიანული გააზრებისთვის.

ჩვენ მადლობას ვუხდით საქართველოს მართლმადიდებელი ეკლესიის ჭიათურის წმინდა დიდმოწამე ეკატერინეს დედათა მონასტრის მონაზვნებს, მცხეთის წმინდა სვინკლიტიკიას დედათა მონასტრის მონაზვნებს, ამ მონასტრების კეთილშობილ მრევლს, რომლებმაც პიუხტიცას დედათა მონასტრის მხარდამჭერი წერილი გაუგზავნეს რიიგიკოგუს.

ქრისტეს სიყვარულით ჩვენ ვლოცულობდით და ვლოცულობთ, რომ უფალმა დალოცოს ესტონეთი და სახელმწიფოს ჭეშმარიტებით შენების მადლი მიანიჭოს: „შეიცნობთ ჭეშმარიტებას და ჭეშმარიტება გაგათავისუფლებთ თქვენ“ (ინ. 8:32).

სიყვარულით

იღუმენია ფილარეტა დებთან ერთად